| Polemiți după numâsearea a premierlui |
| (2009-10-16) |
| Atea dit soni aspuneari: 2009-10-16 12:53 EET |
Easti maș ună arâdeari, că București s-feați ună jgljioată ninti după marli âmbodyiu politic la cari s-agiumsi marțâ prit demiterea, cu ună moțiuni di cenzură, a guvernului minoritar PDL (pro-prezidential), cumândusitu di Emil Boc. Cu ândreptul constituțional, să număsească premierlu, prezidentul Traian Basescu, âli deadi sarțină, gioi, a consilierlui a guvernatorlui ali Bancă Națională, Lucian Croitoru, s-adară un nou guvernu. Reprezentantu ali României la FMI tu chirolu di ma ninti și soț a PDL fără s-hibă membru, Croitoru s-uiduseaști cu portretlu-robot a premierului pi cari Băsescu declară că lu va tu unu chiro greu di criză icunomică, dublată di serti ancăceri poliți ninti di alidzerli prezidențiali di meslu ți yini.: Opțiunea a mea ti domnul Lucian Croitoru vini di aclo că aveam ananghi di un prim-ministru competentu pi problemi di icunumie, problemi macro-icunomiți pi nivel național, ama și pi nivel global. Tutunâoară, dumnilia a lui s-uiduseaști cu câftarea formulată di una parti ditu partidili parlamentari, s- avem un prim-ministru niangajat politic. Dupu ți fu număsit Croitoru tâxeaști că Executivlu pi cari va ari naeti s-lu adară:Va s-hibă un guvernu politic, tu sensul că va s-aibă ananghi s-hibă ândrupatu di partidili politiți și aestă ândrupari prindi s-yină pi calea a tehnocrațlor, dimi s-aleagă oamini ți suntu buni profesioniști și pi cari ș-mini s-potu s-am pisti. Stâmâna ți yini, va s-adaru prota un program icunomic cari s-hibă aprucheat di Parlamentu și, doi, di aesti consultări. Lucru digeaba, fac timbihi analiștili, siguri că virtualu guvernu Croitoru nu va s-amintă votlu a parlamentarlor. Nafoară di PDL, cari, cumu feați ș-ma ninti, u âmbrățătă ântr-oară pripunearea băsesciană, alanti partidi tutu caftă unu Guvernu apolitic, cari s- garantează neutralitatea ali administrație la alidzeri. Asociaț tu ună nauă majoritati, di 65%, PSD, PNL și UDMR și-spusiră iara naetea s-ândrupască un ipotetic Guvernu cumândusitu di primarlu a câsâbălui Sibiu, etnicul ghirman Klaus Johannis. Liderlu PSD, Mircea Geoană:Domnul Traian Băsescu tutu u creaști criza tu cari him. Maxusu, pripuni un candidat ti cari si știei că nu ari ândrupari tu parlamentu. Dimi fați un șantaj politic și constituțional, iara scupolu alithea a domnului Băsescu easti păstrarea a guvernului interimar Boc până di alidzerli prezidențiali, ta s-lu influențează rezultatlu a lor.
Autor: Bogdan Matei
Apriduțearea: Irina Paris
|
2025-04-03
Print
Puteț s-avdzâț căndțido