Radio Romania International

Arhiva :

Guvernul câdzu
(2009-10-14)
Atea dit soni aspuneari: 2009-10-14 14:26 EET Print
Cabinetlu minoritar democrat-liberal di Bucureşti câdzu diunăoară cu prota neauă şi cu ma puţân di doi meşi ninti di alidzerli prezidenţiali. Sâ ştea dininti ţi va s-aducă votlu dit Parlamentu ti moţiunea di cenzură. PD-L (pro – prezidenţial) pâlteaşti, practic, pâhălu arupearil’ei ali coaliţie cu PSD, tu ahurhita a meslui, ghest ti cari aţeali dauă formaţiun’i nica ş-bagă stepsu di la una la alantă. Armaşi singuri pi sţena politică, democrat-liberal’i nu putură s-lu ascapă guvernul, andicra di cari s-avea mutată contra ună majoritati adrată di PSD, PNL şi UDMR. Cabinetlu Emil Boc va s-armână, aşi, tu istoria postcomunistă ca executivlu cu nai ma şcurtul mandat şi ântân’ilu surpatu prit ună moţiuni di cenzură. Premierlu Emil Boc luyurseaşti că ari câdzută curbani a parlamentarlor cari avea frică câ va ş-cheară ifuculiili di itia a noului nom a pensiilor ţi elu avea naeti s-u promovează prit loarea ali responsabilitati. Di alantă parti, adversarl’i âl’i bagă stepsu di populismu şi demagogie. Opoziţia l’i-află căbati a cabinetlui Boc yiruşea pisti legislativ prit multili ordonanţi di ananghi, nâscânti di eali niconstituţionali, şi ufilisearea di primansusu ali loari pi guşi. Di altă parti ama, prezidentul Traian Băsescu lu alăvdă pi Emil Boc ti curailu cu cari li dusi ninti reformili lipsiti ti modernizarea a statlui şi lu critică PSD-ulu că bâgă isăchili electorali nâintea a intereslui naţional. Tora, prezidentul ari sarţina s-bagă un nou premier, după muabeţ cu partidili parlamentari. Maca democrat-liberal’i nica va lu ândrupască pi Emil Boc, majoritatea cari lu surpă guvernul pripuni un cabinet di tehnocraţ, cumândusitu di un independentu, cari s-l’ia misuri anti-criză hâirlâtiţi şi s-asiguripsească organizarea di alidzeri prezidenţiali pi ândriptati şi transparenti. Ti guvernul Boc, aţelu di ma ninti partener social-democrat avea spusă şupeia că ari tu scupo s-facă furlâchi la alidzerli di tu 22 di brumaru ta s-amintă iara şeflu di tora a statlui. „După şasi meşi di figuraţie şi călcat ân cicioarie, Parlamentul ş-u scoasi ahtea.”, comentează COTIDIANUL. Vârnu nu ari câţe s-hibă hârsitu, faţi timbihi, la unison, presa. „PSD şi PNL putură s-lu surpă Guvernul Boc, ama amână ş-u l’ia responsabilitatea s-u l’ia putearea tu chiro greu di criză ”, ângrâpseaşti ZIUA. Publicaţia bagă oară că alumta politică fu amintată, ama după ea armasiră multi surpături – un guvernu cari nu lucreadză pi prag di iarnă, bugetlu pi 2009, cari lipsea s-hibă etim dzâlili aesti şi acâchisearea cu FMI, di la cari lipseaşti s-yină pâradzl’i di cari easti ananghi ta s-u ascapă icunumia di la colaps. Tu aradha a lui, GÂNDUL ângrâpseaşti că Banca Naţională vidzu zori s-intră pi pâzari ta s-nu archişură la vali, pârălu naţional, leulu, iara organismili internaţionali lu criscură piricl’iu di vâsilie ali Românie. Di aestă itie âmprumuturli va s-hibă cama scumpi. Ti aesti condiţii, „icari s-hibă noulu prim-ministru, misiunea a lui va s-hibă şcurtă şi greauă”, anticipează ROMÂNIA LIBERĂ. Cu tuti aesti ari unu insu cari poati s-lu l’ia cumandul a executivlui. EVENIMENTUL ZILEI ângrâpseaşti: „Coaliţia anti-Băsescu va s-imnă pi mână alu Klaus Johannis”. Easti zborlu ti primarlu a Sibiului (chentru), prezidentul a Forumului Democratic al Ghirman’ilor ditu Românie, persoană publică tin’isită di tuţ ti turlia cumu lu-ari administrată câsâbălu transilvan tu 2007, fu capitală culturală europeană. Numa alu Johannis fu pripusă di liderlu liberal Crin Antonescu şi aprucheată di ună coaliţie ad –hoc, di napandica, di cari facu parti şi social-democraţl’i şi UDMR. Autor: Ştefan Stoica Apriduţearea: Irina Paris

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International