Radio Romania International

Arhiva :

Criză politică tu Românie
(2009-10-01)
Atea dit soni aspuneari: 2009-10-01 13:39 EET Print
Tută lumea, tu Românie, dzăţi că taha cilăstăsi s-nu s-agiungă la criza politică ţi ahurhea să s-veadă, ama di gioi, criza agiunsi oficială şi yini tu ună catandasi icunomică şi socială cinuşii cătă laiu. Giumitatea social-democrată lu apărnăsi guvernul di coaliţie, după ţi prezidentul Traian Băsescu lu simnă până tu soni decretlu di revocari ditu funcţie a ministrului PSD a internilor, Dan Nica. Câftarea ti revocari u avea bâgată premierlu democrat-liberal, Emil Boc, niifhăristisit di criştearea a ratăl’ei di infracţionalitati tu chirolu a mandatlui alu Nica, şi macsusu di declaraţiili prit cari aestu spunea şupeia că PD-L( pro-prezidenţial) s-andreadzi s-facă furlăchi la alidzerli prezidenţiali ditu 22 di brumaru. Şeflu a statlui, ti cari adversarl’i au şupeie că easti la cumandul ali operaţiuni scuteari a PSD ditu executiv, vru s-li mbuneadză părtâli ţi s-âncaci şi pripusi tu ahurhită, aţilor dauă partidi numâsearea unu ministru independentu ică ditu opoziţie, dupu ţi ma ninti l’i-avea dzâsă al Dan Nica să-ş bagă demisia ta s-bitisească âncăcearea ditu coaliţie. Social-democraţl’i lu-ndrupară ama Nica, iara miniştril’i PSD au demisionată tuţ, aşi cumu avea faptă timbihi. Mariajlu di conjunctură anamisa di vecl’il’i duşman’i, PD-L şi PSD, ţi s-feaţi după mecilu a lor isa di la legislativili ditu 2008, s-bitiseaşti după după 10 meşi di âncăceri şi tensiun’i aproapea niacumtinati şi cu ma puţân di dauă ninti di scrutinlu prezidenţial. Tamam aestu scrutin eara argumentul a analiştilor cari avea dată ali oaliţie slabi şansi ta s-tână cheptu pân di işita a anlui, condiţiili tu cari principal’i competitori ti funcţia supremă s-ari că va s-hibă numirli unu şi doi ditu stat - Traian Băsescu, şi liderlu PSD, actualu şef a Senatlui, Mircea Geoană. Nu puţâni fură aţel’i cari au criticată em disfuncţiili ditu coaliţie em şi prestaţia mediocră a guvernului patronat di dauăli partidi. Opinia aiştor easti confirmată di punctajlu minim dat di ună Universitati ditu Ghirmănie ti misurli anti-criză adoptati di guvernu. Pi di altă parti, situaţia politică agiundzi para di fluidă tamam cându arăvdarea a sindicitelor pari că agiunsi tu mardzină, iara solidaritatea socială easti multu fuvirsită. Sindicatili a angajaţlor ditun sistemlu public românescu, adunati ad-hoc tu Alianţa a Bugetarlor (aţilor ţi suntu păltiţ di stat), au demonstrată, n’iercuri, că suntu apufusiti s-tin’isească integral călindarlu di protesti apufusitu şi s-lu tindă ş-ma multu, di una manieră radicală, maca niifhăristisirli a lor nu va s-l’ia apandasi di partea a putearil’ei. Bugetarl’i caftă pâzârâpsearea diznou, tu reghim di ananghi a nomluiali salarizari unitară, ţi nu u aproachi câţe va s-aducă ună ascădeari a amintaticlui a lor, cum şi ş-nu s-facă cama disponibilizări tu sistem şi vacanţili di dzăţ di dzâli fără plată. Echidistanţi tu ncăcearea anamisa di PD-L şi PSD, bugetarl’i au pichetată sediili di Bucureşti şi ditu provincie a dauălilor formaţiun’i. Va s-yină dapoia greva generală di luni, 5 di sumedru şi un mari miting dupu daua dzâli. Nu easti exclusă niţi ună grevă ghenerală pi chiro fârâ vade, faţi timbihi liderlul di la unu di sindicatili a funcţionarlor publiţ, Vasile Marica: “Avem patru căftări ligati di tin’iili di cafi mesu a lucrătorlor, vacanţi, scuteri di pi lucru şi tora pistipsescu că, după aesti acţiun’i şi după data di 5, cându va s-fâţem grevă ghenerală, va s-fâţemu di aesti mesaji unu multu ma sertu, căţe putemu s-ândridzemu şi ună grevă ghenerală pi chiro fârâ vade, după data di 5, cându va s-avemu ună grevă di ună dzuuă, la cari va s-poată s-participă vârâ 700 di n’il’i di oamin’i” Autor: Stefan Stoica Apriduţearea: Irina Paris

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International