| La ONU, yinitorlu ali uminitati |
| (2009-09-23) |
| Atea dit soni aspuneari: 2009-09-23 12:49 EET |
Fuvirsearea tu ațea ți mutreaști piricliurli ți potu s-li aducă alâxerli climatiți easti mari, urgentă și pi crișteari și xichea a născăntor acțiuni sânâtoasi, pi ayunii și comuni, poati s-cindamnă bârnili ți yinu la unu fânico ireversibil. Aestă timbihi u feați liderlu di la Casa Albă, Barack Obama, la summitlu ONU di New York. Obama adusi aminti obiectivlu a Washingtonlui s-asacadă, pân tu 2020, emisiili di gazi cu efectu di seră tu SUA pân di nivelu ditu 1990, și li aclimă pi liderli a lumilei să alumtă deadunu cu elu contra ali angâldzari globală. China, cari acață tora protlu locu tu ațea ți mutreaști emisiili di gazi cu efectu di seră, nintea a SUA, ari tăxită ș-ea, acțiuni ti ânchidicarea ascădearea ali angâldzari globalăe. Prit boațea a prezidentului Hu Jintao, Beijingul zbură ti ună ascădeari semnificativă a emisiilor di carbon tu China, tu aești 10 ani ți yinu. Intențiili fură ghini aprucheati, ama participanțăli aștipta ma multi detaliuri di partea a aților doi mari poluatori - SUA și China, responsabili ti 40% ditu emisiili globali di dioxid di carbon. Cu tuti aesti, dzâsi secretarlu gheneral al ONU, Ban Ki-moon, summitlu di New York deadi ună nauă silă a pidimolui di abordari ali angâldzari globală, iara la yinitorlu summit pi aestă temă, cari va să s-facă tu andreu Copenhaga, easti multu posibil s- si agiungă la ună acăchiseari. Chirolu easti para șcurtu ti darea nanaparte a niuduserlor di păreri care âmbudyisescu adrarea ună acăchiseari globală tu dumeni, suntu di păreari analiștili. Ministrul român ti politica cu xeanili, Cristian Diaconescu, reprezentantu ali Românie la summitlu di New York, pistipseaști că : Easti posibilă adrarea ună acăchiseari globală, ună acăchiseari cu puteari juridică. Pi di altă parti, easti ananghi și di un mecanismu cari, dinclo di acâchisearea juridică, s-aibă tu videari ândrupari și programi financiari și tehniți prit cari vâsiliili cari au tu aestu moment ahtări emisii s-participă la un proiectu comun cu alanti stati. Câțe apufusearea a angajamentilor financiari di aest punctu di videari easti multu importantă. România, tu Protocolu di Kyoto, ari bâgat unu prag ti emisiili di gazi cu efectu di seră și easti interesată ca, tu condițiili tu cari aesti coti va s-hibă limitati, ațea ți nu ufiliseaști s-armână la dispoziția aliei, itia hiinda conotațiili financiari importanti. UE și-lo unilateral angajamentul s-ascadă la nivel comunitar, până tu 2020, emisiili di gazi cu efectu di seră cu 20 % andicra di nivelul înreghistrat tu 1990 ș-dapoia dupu ți tuti statili dezvoltati și mării poluatori va s-acăchisească ti misuri comparabile, România, deadunu cu UE, va s- treacă la unu scupo di ascădeari a emisiilor di gazi cu efectu di seră di până la 30%.
Autor: Corina Cristea
Apriduțearea: Irina Paris
|
2025-04-03
Print
Puteț s-avdzâț căndțido