Radio Romania International

Arhiva :

Criza politicâ s-duţi ninti?
(2007-05-31)
Atea dit soni aspuneari: 2007-05-31 14:12 EET Print
"Avem ananghi di unâ nauâ elitâ politicâ, cari sâ-l’i reprezintâ dealithea pi român’i" – dzâsi susto prezidentul Traian Băsescu, tu zborlu ţânut dinintea a camerilor uniti a Parlamentului di Bucureşti. Easti protlu mesaj spus di Băsescu dinintea a unui Leghislativ di multu chiro duşmânos ş-tora ayon’ia azvimtu. Aduţemu aminti câ tu 19 di apriir, unâ majoritati conjuncturalâ, ama sânâtoasâ, di trei pătrimi, tu cari PNL si UDMR (la co-guvernari) s-avea asociatâ cu PSD, PRM ş- PC (tu opoziţie), votă ti suspendarea dit funcţie a şeflui a statlui, sum acuzaţia di câlcari ali Constituţie. Dupâ tamam un mesu, electoratlu lu ascâpă şi 75% di aligâtori sâ spusirâ, prit referendum, contra a demitearil’ei a lui. Ia ţi dzâsi aieri Băsescu: “Unâ asimetrii numericâ ahâtu mari anamisa di reprezentanţâ şi aţel’i pi cari îl’i reprezintâ scoati tu migdani unâ ampârtări anamisa di Parlamentu şi popul, anamisa di votlu dit 2004 şi catandisea di tora tu unâ democraţie autenticâ ahtări disuiduseri suntu bâgati pi aradhâ ântr-oarâ..” Şi, di punctul a lui di videari, “singura soluţie tin’isitâ” easti demisia a guvernlui minoritar şi închisearea di alidzeri leghislativi anticipati, cari va lâ da a partidilor şansa sâ si âmpacâ cu electoratlu a lor. Tu reţeta ali yitripseari di şocu pripusâ di prezidentu ti reforma salami ali clasâ politicâ easti tricutâ şi adoptarea a votlui uninominal la alidzerli Leghislativi cum şi a nomlui ali lustraţie. El dzâsi ş-că easti ananghi sâ s-treacâ la un Leghislativ unicameral icâ, barim scâdearea semnificativâ a numirlui di deputaţ şi senatori. Tuti alichescu cu pâltărli di muru unâ coaliţie antiprezidentialâ cari referendumlu u spusi ca nivrutâ di popul. Şefan’il’i a l’ei nu voru s-fugâ ama fârâ alumtâ ş-da apandasi caustic. Liderlu PSD, Mircea Geoană: “Fu unâ cuvendâ cu acţenti importanti di arăzbunari ş-di vendetâ politicâ. Tu aestu momentu, România ari ananghi di bitisearea ali crizâ politicâ, ş- nu di criştearea a l’ei.” Şi viceprezidentul PNL Crin Antonescu: “Tu aestâ prezentari iasi tu migdani obsesia cama veacl’ie sâ-l’i surpâ pi Călin Popescu Tăriceanu ş- pi liberal’i di la guvernu.” Monitor neutru a ncâciturlor politiţi, analistul Cristian Pârvulescu pistipseaşti ama, câ virulenţa prezidenţială easti unâ mutari tacticâ, ghini minduitâ: “Traian Băsescu easti un politician realistu, ştie că nu poati niţi sâ surpâ guvernul, niţi alidzeri anticipati. Pi di altâ parti, ari un aliat şi aestâ u ştim di la referendum, opinia publicâ. Şi atumţea va s-ufiliseascâ iţi itie, inclusiv mesaju di dinintea a parlamentului ta s-bsgâ guvernul tu defensivă, ta s-bagâ majoritatea antiprezidenţială tu defensivă, cu alti zboarâ, ta s-amintâ niţ victorii di etapă cu nâdia câ va-l’i da di padi adversarl’i a lui.” Autor: Bogdan Matei Armânipsearea: Irina Paris

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International