Radio Romania International

Arhiva :

Justiţii şi monitorizari
(2009-09-15)
Atea dit soni aspuneari: 2009-09-15 14:02 EET Print
Vidzută ditu Europa, Justiţia română ari ună opsi ma bună di aţea ditu văsilie. Consiliul ti Afaceri Generali şi Ligături cu xeanili ali Uniuni Europeană (CAGRE) u validă, luni, Bruxelles, recomandarea ditu Raportul pi Justiţii ditu meslu alunaru ali Comisiei Europeană ta s-nu mata activează clauza di salvgardari ti România. Cheari aşi, piricl’iu ca sentinţili a instanţilor româneşti s-nu mata hibă pricunuscuti di alantă parti ali Uniuni. Şeflu ali diplomaţie românească, Cristian Diaconescu, preţiză ama, că ună deţizie formală va s-hibă loată maş tu momentul cându va s-umplă vadelu di 3 an’i di la aderarea a Bucureştiului la UE, dimi prot di yinaru 2010. Şi că, pi ninga aestă, reforma ditu sistemlu judiciar prindi să s-ducă ninti, câţe pasivitatea, ş-nica ş-ma multu leanea a instituţiilor autohtoni poati s-aducă stămusearea a fluxului a fondurlor europeani ti România ică aderarea aiştei la spaţiul Schengen. Tu aestu chiro, Bucureşti s-duţi ninti polimlu a nervilor anamisa di guvernanţâ şi magistraţ. Nica di la ahurhita a meslui, aeşti ditu soni, niifhăristisiţ că Nomlu ali salarizari unitară tu sectorlu bugetar va li n’icşuradză amintaticlu, au intrată tu ună grevă ahoryea. El’i nu mata giudică că maş dosari mutrinda lundzearea a arestului preventiv ică plasamentul a minorlor. Ma multu, sindicatlu a personallui auxiliar apufusi că şi grefierl’i şi arhival’i s-l’ia parti la protestul ânchisitu di giudicători şi s-nu mata tin’isească programlu di lucru cu publiclu. Strictu teoretic şef pisti un sistem practic paralizat, ministrul ali Justiţie, Cătălin Predoiu, dzâţi că Nomlu ali salarizari unitari nu va s-aducă ună ascădeari a lefurlor a magistraţlor: “Easti un rezultat ma multu di rezonabil, easti un obiectiv ţi lu-avemu apufusită şi l-avem agiumtă şi pi baza aiştui obiectiv pistipsescu că guvernul ari ândreptu , şi legalmenti, şi moral, s-caftă a adunărilor generali a magistraţlor s-l’ia actu di aestă catandisi şi s-dănăsească protestul. Escu conştientu că problema ali salarizari easti maş ună di problemili structurali, fundamentali a sistemlui judiciar, ama nu easti puţân lucru factul că ea easti ândreaptă – dzâcu mini – ună turlie ma multu di rezonabilă.” Tu aţea ţi mutreaşti curbăn’ili colaterali a aiştui polim, român’il’i di aradhă, fără s-hibă fârâ di altă di partea a Guvernului, nu suntu, facu timbihoi analiştil’i, niţi solidari cu magistraţl’i. Câţe, ângrâpseaşti jurnalu bucureştean ROMÂNIA LIBERĂ, pi di ună parti “solidaritatea nu si caftă cu mâna teasă”, iara pi di altă “aţel’i ţi zburăscu tu numa a lor suntu simboluri yii a unăl’ei justiţie ţi l’ia aruşfeti.” Autor: Bogdan Matei Apriduţearea: Irina Paris

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International