Radio Romania International

Arhiva :

Festival medieval, Sighişoara
(2009-07-27)
Atea dit soni aspuneari: 2009-07-27 13:53 EET Print
Cu geadeili a l’ei adrati dit cheatră şi casi cu arhitectură saxonă, ţitatea medievală Sighişoara dit ţentrul ali Transilvanie, singura nica bănată tru sud-estul ali Europă, adună, şi estan, dzăţ di n’il’i di turişti cu vrearea tra s-l’ia parti la festivalu cari aduţi diznău dininti tricutlu chiro. Chiro di trei dzăli, atmosfera dit chirolu di ma năinti inşi tu migdani dit fascinanti antriţeri cu oamin’i căvălari, dit pirmithi spusi di pirmisitori ică dit spectacoli afiriti di şcol’iurli di gicouri ică di trupe di teatru. Căvalarl’i cu armati şi apali, dumniţi anviscuti tru fustani dit sirmă şi danteli, saltimbanţă, cuclari, iluzionişti, deadun cu prinţă, văsiloan’i ică măyistri putură s-hibă andămusiti iuţido. Geadeili strimti nu-l’i ancăpea vizitatorl’ii dit România, a curi lă si adăvgară aţel’i ţi eara viniţ dit Franţa, Germania, Italia, Cehia, Japonia ică Marea Britanie. Organizatorl’ii avură ngatan că a vărnui ş-nu-l’i si aurască. Minduit ca ună manifestare interactivă, festivalu di artă medievală acăţă tu isapi concerte şi parade, ama şi atelieri di lucru i multi concursuri, aţeali ti acăţarea a purţiluşlui, ti disicari leamni ică ti trădzeari curmul hiindalui maş ndauă. Tru tăburaea a căvălarlor eara membril’i a Ordinlui a Căvălarlor di Mediaş, căvălarl’i a Ordinlui Lup di Târgu Mureş şi cavalerl’ii Taborski Kupci dit Cehia, cari şi spusiră giunamea tru turniruri. Tuti, avândalui tu simfunii acorduri ali muzică veacl’i, interpretati cu tulniţi, tămpăn’i, găidză. Niţi ficiuriţl’i nu fură agărşiţ, tră el’i hiindalui andreaptă ună piaţă specială, a n’iţlor papii, iu aeşţă putură tra s-veadă spectacoli di marioneti ică anviţară protili jgl’ioati di giocuri medievali. Anamisa di muşuteţli a festivalui s-arădăpsiră şi alidzearea a “Prinţesăl’ei a Titatil’ei”, tru arada a unlui concursu di miss, tru finala a curi s-andămusiră şasi concurenti. Dumănică dicseara, tru ceapili cadenţati a căvălarlor cari s-trapsiră cu focurli apreasi pi ciumădz şi tru plăscănerli a focurlor di artifiţii, pirmithlu di Sighişoara ediţia 2009 s-bitisi nu năinti, tra s-hibă “curmat arăulu”, tru măyia a unal’ei măyistră arsă pi arug. Participanţăl’ii ş-deadiră diznău andamusi pisti un an tru burgul dit Transilvania încărcată di istorie. Tră aţel’i ţi nica nu bănară experienţa a turnaril’ei tru chirolu a etăl’ei di mesi, lă spunem coordonatili tra s-aibă chiro până di vără an s-adună hăbărli: Sighişoara, ţentrul ali Românie, la aproapea 100 di km tu apirită di căsăbălu Sibiu, capitală europeană tru 2007, un altu reper încărcat di obiectivi culturali, chiola şi pirguri di ţitati medievală şi 15 băseriţ. Tră aţel’i cari nica suntu pi dauă, nica s-vă spunem că nu multu alargu, la 40 di km di Braşov, easti hoara Viscri, hoara săsească cari lu-feaţi pi prinţul Charles ali Marii Britanii să spună multă vreari şi fără di turnari tră locurli dit Transilvania. Textul:Corina Cristea Apridutearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International