| Acâchiseari di âmprumut cu FMI |
| (2009-04-24) |
| Atea dit soni aspuneari: 2009-04-24 13:02 EET |
Nu ari armasâ multu chiro pânâ cându Romania va s-hârseascâ di ațeali 13 di miliardi di euro di la Fondul Monetar Internațional, ți au tu scupo s-li ascadâ efectili ali crizâ icuonomicâ. Cartea di naeti ti bitisearea ali acâchiseari di imprumut fu simnatâ, gioi, București, di ministrul a Finanților, Gheorghe Pogea, și di guvernatorlu ali Bancâ Naționalâ ali României, Mugur Isărescu, imprumutul hiinda ândreptu tu ișita a meslui marțu. Documentul fu dapoia pitricutu la instituția financiarâ cari lipseaști s-lu aprobâ tu 4 di maiu, ș-prota parti ali finanțari, di 5 miliardi di euro, va s-hibâ disponibilâ ântr-oarâ dupâ aprobari. Premierlu Emil Boc dzâsi câ acâchisearea di âmprumut va s-hibâ datâ Parlamentului ti ratificari. Emil Boc: Him pi linie dreaptâ ti bitisearea ali acâchiseari di âmprumut. Obiectivlu a nostru fundamental easti s-nu li chiremu locurili di lucru a românilor, s-dămu silâ ali icunumie și ali creditari ali icunumie, și sigura, indirect pi aestâ cali, s-putemu s- asiguripsimu pâltearea a tiniilior di cafi mesu a lucrâtorlor și a pensiilor tu Românie. Acâchisearea di âmprumut pruveadi ândauâ condiții majori prețiză Emil Boc. Easti zborlu ti unâ alâxeari di 1,1% ditu PIB, alâxeari ți fu adratâ di Guvernu, cu agiutorlu a unâlei ordonanțâ di ananghi ți lipseaști s-u aprobâ Parlamentul. Alti angajamenti suntu adoptarea a nomlui unic a tiniilor di cafi mesu tu sistemlu bugetar, a nomlui mutrinda responsabilitatea fiscalâ și, nu dip tu soni, adoptarea, pânâ di ișita a anlui, unâ nauâ turlie di majorari a pensiilor. FMI ari câftatâ ca pensiili s- nu mata hibâ ligatoi di tinia di mesi prognozatâ, ama eali s-creasca periodic, ligati di rata ali inflație. Tu aradha a lui, ministrul a Finanților, Gheorghe Pogea, dzâsi câ unâ di condițiili apufusiti cu Fondul easti ca majorarea a tiniilor di cafi mesu tu companiili di stat cari va s-aibâ amintatic s-hibâ ligatâ di criștearea a productivitatilei a lucrului. Tu ațea ți mutreaști xichea bugetarâ minduitâ pâzârâpsitâ cu instuția financiarâ ti doilu trimestru a aiștui an, aestâ fu stabilitâ la 4,6%. Tutu stâmâna aestâ, Comisia Europeana ari pripusâ a Consiliului European darea a âmprumutlui pi chiro di mesi di 5 miliardi di euro câftatu di Romania. Aesti âmprumuturi fac parti dit unâ pachetâ multiplâ di finanțari externâ, inclusiv di la Banca Mondialâ și BERD, ți fați vârâ 20 miliardi di euro.
Autor: Leyla Cheamil
Armânipsearea: Irina Paris
|
2025-04-03
Print
Puteț s-avdzâț căndțido