Radio Romania International

Arhiva :

Diplomaţia şi ligaturli româno-italieni
(2009-02-24)
Atea dit soni aspuneari: 2009-02-24 13:29 EET Print
Andamusea di Roma a miniştrilor ti politica cu xeanili român şi italian s-feaţi pi fondul a curentului românofob cari acâţă iara silâ tu Peninsulă după un nou baiuri di crimi şi aruşunări de mul’ieri fapti di imigranţi român’i icâ ti cari lâ bagâ stepsu aluştor. Praxea ostilă , duşmânoasâ ţi u spunu unâ parti a presâl’ei cumu şi nâscânţ politicien’i italien’i andicra di comunitatea româneascâ u gâilipseaşti opinia publicâ ş-clasa politicâ di Bucureşti şi bagâ tu piricl’iu aţea ţi părtâli numâsescu parteneriatlu strateghic anamisa di dauăli statie. Şeflu ali diplomaţie di Roma, Franco Frattini, vru s-li limbidzascâ lucârli şi dzâsi câ liogâtura bilaterală easti sânâtoasâ. El sumcundil’ie că zn’iili greali ti carâ s-bagâ stepsu a unui numir n’ic român’i nu lipseaşti s-cadâ pi guşa a conaţional’ilor cari tin’isescu nomurli şi care, prit activitatea a lor, agiutâ la cristearea ali icunumie italianâ. Frattini câftă ama, ca autorităţli di Bucureşti să-l’i apriadunâ tu vâsilie pi cetăţen’il’i român’i cari furâ condamnaţ definitiv tu Italie şi să da hâbari cându cetăţen’il’i român’i cari au cazier s-ducu tu Peninsula. România ari borgi – cama dzâsi Frattini – s-creascâ numirlu di poliţiştii pitricuţ tu misiuni tu Italie. Di partea a lui, ministrul român Cristian Diaconescu cutuyursi, nica unâ oarâ, iţi tentativă s-arucâ lăschi pi comunitatea românească tu ansamblu, di itia a membrilor a l’ei cari adarâ zn’ii. Tutunâoarâ, Diaconescu dzâsi câ nu aproachi categoric, niţi unâ ângârdiri a ândreptului a român’ilor la libira urdinari, invocată di jurnaliştil’i italien’i ca unâ cali s-bagâ mardzinâ la aţea ţi nâscânţ di el’i duchescu ca un exportu di infracţionalitate. După părearea a lui, easti borgea a dauâlor stati s-l’ia misuri contra ali criminalitati. Cristian Diaconescu: “Zburâmu ti cetăţen’i europen’i cari au ândrepturi şi obligaţii isa tu întreg spaţiul european, em di punctul di videari ali responsabilitati andicra di nomlu penal di tuti vâsiliili membri ali UE, cum şi andicra di ândreptul s-hibâ apăraţ di nomlu ali vâsilii iu bâneadzâ ş-lucreadzâ. Di partea a mea s-mini pot s-ântrebu cari easti apandasea a autorităţlor italien’i andicra di cetăţen’il’i român’i cari cad curbani a nâscântor zn’ii di idyea turlie. Infracţiunea nu ari cetăţenie, infracţiunea nu ari naţionalitati. Borgea a noastrâ easti s-lom tuti misurli ţi li pruved nomurli ti ta s-ănchidicăm şi s-ţânemu cheptu a lâieţlor ţi li adară aţel’i ţi suntu ncâceaţ cu nomurli. Nu, nu va s-lom niţi unâ misurâ s-ânchidicămu ândreptul la urdinari. Noi, ţi avemu ascâpatâ di comunismu, lu amintămu cu zori aestu ândreptu. Şi easti zborlu ti un ândreptu a unui popul”. Autor: Ştefan Stoica Apriduţearea: Irina Paris

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International