Radio Romania International

Arhiva :

Ună ipotisi ptsanu vrută
(2009-02-03)
Atea dit soni aspuneari: 2009-02-03 12:11 EET Print
Tu Romania, scamnul di ministru di Interni fridzi di nu să straxeashti. Luni, ti furnjia a ixichiljei resursili financiari ti minister, năulu aleptu ti aestu portofoliu, social-democratlu Liviu Dragnea, sh-deadi demisia dupu maşi 12 di dzăli după investiri. Tu zboară sportivi, Dragnea surpă recordul di viteză apufusit di predecesorlu a lui şi aţel di ma ninti soţ di partie, Gabriel Oprea, cari, meslu ţi tricu, dupâ ţi PSD âl’i trapsi adophiul politic, ş-deadi şi el demisia di pi ipotisea ţi u avea girată maş 23 di dzăli. Tu zboară financiari, tu arada a moeabetslor ti un buget fatalmenti di criza, Dragnea spunea că fondurli ahărdziti nu vrea-l’i dădea izini ti băgarea tu lucru scupadzl’i ţi şi-l’i lo ş-că aleapsi fudzearea ta “s-nu scoată mintireaşi tu suţata ţi easti la guvernari” adrată dit PSD şi PD-L (pro-prezidenţial). El spuni că nu poati s-armănă niminat anda easti zborlu ti n’icşurarea a resursilor ahărdziti ti autorităţli locali nica ş-niasiguripsearea a nâscăntor serviţii di calitati ti cetăţean’i. Liviu Dragnea: “Achicăsescu sirţăl’ia bugetară, ama nu aprochiu ti s-l’iau parti la apofasi ţi-n’i ncheadică aestu mandat ş-deapoa s-mutrescu fără noimă la soţl’i a mel’i şi s-lă exighisescu, ama că nu am resursili ti cari am ananghi ta să-n’i tin’isescu zborlu. Ahât chiro cât structurli a ministerlui nu sunt andrupăti financiar, nu poţ s-ai ngătan şi s-asiguripseşţă isihia a cetăţeanlui.” “Goada di teatru tu Cabinetlu Emil Boc: nica un ministru di Interni demisioneadză” - ngrăpseaşti cotidianlu ROMANIA LIBERA, consemnândalui nica şi alti furn’ii nimărturisiti ali demisie. Izvuri politiţi spun că Dragnea ş-ari dată demisia ti furn’ia a niachicăserlor tră alidzearea a unui nău cap la Direcţia Generală di Informaţii şi Protecţie Internă a ministerlui, ipotisi-cl’eaie cari dusi şi la nivrearea al Oprea. Pripunirli a aţilui dit soni demisionar nu vrea s-eara aprucheati em di PSD, em ş-di PD-L. Liderlu a stângâl’ei, Mircea Geoană, să spusi niifharistusit di apofasea al Dragnea şi spusi că nu easti furnjia ti niapruchearea a niscăntor di-tu oamin’il’i pripuşi di el. Geoană tăxi că PSD va s-află un treilu ministeriabilu ti ma pţănu di doi meşi di dzăli: “Avem ună listă shcurtă, ama va s-apufusim multu ayon’a nica na oară. Presia easti ama mari tu aestu minister, vahi ş-că momentul fu multu complexu, şi politic şi bugetar şi di altă turlie. Goala cearei tsi u-avem easti s-tin’isim apofasea a soţlui a nostu şi s-yinim cu un om di ună multu bună axie. Ama va s-adaru aestu lucru tu un for statutar di partid.” Ti partenerl’ii pedelişti, demisia al Dragnea easti ună problemă orlea zorlea internă a social-democraţlor. Secretarlu executiv a PD-L, Mircea Toader: “Minduescu că naima importantulu lucru easti să s-ndreagă cât ma ayon’a şi easti ună problemă a PSD ţi singur va u-andreagă aşi cum minduescu năşi că easti ti bun.” Tehnic, vidlu di autoritati yini tamam căndu tut adil’eaticlu poliţieneascu dit Romania cilăstăseaşti s-l’i află aţeali cama di 50 di armati di foc furati dit-ună măyăzie di ninga Bucureşti ali Armată şi di autorlu a unlui diplo asasinat Brasov (centru). Iara politic, nisimfunizărli dit chipita a Internilor u creaşti duchimăsearea di amatorismu şi improvizaţie cari imnă deadun cu aestu guvernu paradoxal, cu naima marea andrupari parlamentară dit chirolu post-comunistu (cama 70%), ama şi cu aţea ma slabă scară di pistusini tu arada a cetăţean’ilor. Textul: Bogdan Matei Apriduţearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International