Radio Romania International

Arhiva :

Candidaţ tră Primăria a Bucureştiului – 2011.09.20
(2011-09-20)
Atea dit soni aspuneari: 2011-09-22 12:19 EET Print
Primarlu general a Bucureştiului, Sorin Oprescu, deadi hăbari că va s-candideadză anlu ţi yini tră un nău mandat, tu harea di independentu andrupăt di Uniunea Social-Liberală, di opoziţie. Oprescu, liderlu a PSD, Victor Ponta, şi aţel a PNL, Crin Antonescu, thimil’iusiră aţea ţi numasiră „un parteneriat tră Bucureşti”. Sorin Oprescu: „Aoa easti zborlu di un parteneriat moral, un parteneriat anamisa di USL, Sorin Oprescu şi bucureşteni, iara andruparea ali USL yini ca ună platformă cari poati să-u dipărteadză tut ma multu apofasea politică, di nai cama multi ori hiindalui tanal’iurea, dit administraţie”. Acă minutişurli ti achicăseari nu fură nica apufusiti, Ponta veadi tu naua construcţie formula di amintari tră bucureşteni. Victor Ponta: “Io minduescu că ună parei adrată dit Sorin Oprescu, Crin Antonescu, Victor Ponta, dit un primar general, Sorin Oprescu, şasi primari di sector şi un Consiliu General cu majoritatea Uniunil’ei Social Liberali va s-poată ta ş-tin’isească prota borgi, aţea andicra di bănătorl’i a muniţipiului Bucureşti”. Şi Crin Antonescu cundil’e că, tru PNL, andruparea al Oprescu „easti ună unanimă, fără echivoc şi trădzeari mănă'. Cu tuti aesti candidatura al Oprescu easti pi cali s-aducă ună ampărţari tru Uniuni. Liderlu a PC - formaţiuni cari faţi parti dit USL - Daniel Constantin, spusi că apofasea ti andruparea al Oprescu nu s-lo dupu vără moabeti dimec ti antribarea a conservatorlor. El dimăndă că PC va s-ducă ahoryea tru alidzerli locali şi va ta s-aibă candidat la Primăria Generală primarlu a sectorlui 4, pi Cristian Popescu Piedone. Daniel Constantin: “Partidlu Conservator ari un candidat ţi easti ndreptu păn di mardzină, un candidat pi cari lu-ndrupaşti ma largu, di furn’ia că easti multu vrut di bucureşten’i şi pistipsescu că aţea ţi agiumsi ta să scoată tu migdani tu sectorlu 4 poati s-hibă faptu diplo multu lişor tru tută capitala. Ti aestă furn’ie lugursim că apofasea nu easti statutară, nu easti tu simfunie cu protocolu ali Uniuni Social Liberală şi aştiptăm la yinitoarea andamusi di lucru ali USL să zburăm ti aestă problemă”. Constantin nica spusi că, până anda va s-l’ia ună apofasi di bitisită, a unăl’ei apofasi ufiţială tu simfunie cu protocolu a USL, pot să s-alăxească multi lucri. Adversarl’ii politiţ ali USL suntu haristusiţ di habarea ali opoziţie, premierlu Emil Boc lugursindalui că, tu aestă oară, nădiili ti amintari al Sorin Oprescu suntu n’iţ. Emil Boc: “S-aştipta di multu şi s-cunuştea aestu lucru. Minduescu că ază USL şi Sorin Oprescu ş-bătură ună penură ti curmarea a mandatlui al Sorin Oprescu tru 2012”. Sorin Oprescu amintă Primăria ali capitală tru 2008, tru harea di independentu, dinintea a democrat-liberalui Vasile Blaga. Sondajili di căftari a minduităl’ei tru lao u spun USL ca hiindalui cu nai ma mărli nădii ta s-amintă tru alidzerli locali tu capitală, Bucureşti şi aţeali parlamentari, pruvidzuti tut tră anlu ţi yini. Textul: Daniela Ştefănescu Armânipsearea: Taşcu Lala Puteţ ta s-ghivăsiţ nota pi www.rri.ro şi pi facebook.

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International