| AUTOMOBILILI DACIA DUPĂ LOGAN, SANDERO |
| (2008-10-28) |
| Atea dit soni aspuneari: 2008-10-28 12:07 EET |
Autoturismili ieftini, destinati inițial ti pâzărli emerghenti, lă au tutu ma mari hari a muștiradzlor europeni. Un exemplu tu aestu sensu easti vedeta ali expoziție mondialâ a automobilului di Paris, berlina compactă Sandero, favricată la uzinili Dacia ditu Românie, ți țâni di concernul Renault. Lansată toamna aestâ, Sandero concurează cu sucțes rivali mini-citadini cumu suntu Toyota iq, Smart icâ Pixo, prota "low cost" lansată di Nissan. Favricantul Dacia, iu s-fați marca Logan, pionieră tu materie di pâhadz niț, cum și nai ma naua Sandero, și-li criscut, tru proțli trei meși a aiștui anu vânzărili cu 33%. Sigura, nai ma multili autoturismi marca Dacia s-vindu tu Românie, ama crișteri sânâtoasi s-feațirâ tu Franța 43% și Germania 25%. Sandero, aftuchinâ pi cari Renault avea prota unuti s-u comercializeazâ pi pâzărli braziliană și argentiniană, fu lansată tu Franța cu un pâhă di aproapea 8.000 di euro. Em pâhălu, em liniili ma puțân serti a noului Sandero andicra di Loganlu di ma ninti, s-par multu pi chefea a muștiradzlor ma tiniri. Pi ninga aestâ, specialiștili pistipsescu câ automobilu nu mata easti, ca ma ninti, un simbol a statutului social și că alâgarea dupu aftuchini cât ma mări și ma scumpi ca bitisi. Directorlu comercial al Renault ti Franța, Jacques Chauvet, dzâțea că gama Logan Sandero easti unâ bunâ apandasi ti unâ puteari di ancupârari cama nicâ. Ațeali 1.465 di Sandero vinduti maș tu meslu yizmâciun tu Franța par s-u ndrupascâ aestâ minduitâ. Dânda cali ali Sandero tu Europa, Renault ari nâdie s-capitalizeazâ sucteslu ți lu avu cu Logan, unâ aftuchinâ a curi fabricație easti nica di tora tu proțentu di 70% tu Românie și di cari, di la lansarea a lei sa tu 2004, s-au vindutâ ma multu di unâ miliuni di exemplari tu 59 di vâsilii.
Autor: Mihai Radulescu
Armânipsearea: Irina Paris
|
2025-04-03
Print
Puteț s-avdzâț căndțido