Radio Romania International

Arhiva :

Politica bancară şi imnaticlu a crizăl’ei
(2008-10-27)
Atea dit soni aspuneari: 2008-10-27 12:59 EET Print
După ţi tocurli di pi păzarea interbancară agiumsiră tu ună scară lăhtăroasă, Banca Naţională a Româniil’ei lo meatri prit cari s-nu s-agiungă la triţearea niăntimil’iată cătă muştiradzl’i a bănţălor comerciali a crişterlor. Guvernatorlu a BNR, Mugur Isărescu, vini, diznău, dinintea a presăl’ei şi feaţi timbihi că poati s-căndăsească alăxearea a nomurlor ahtari turlii tra s-l’i-alăxească di pi ipotisi bancherl’ii ţi bagă tu piricl’iu siguranţa a bănţălor. El exighisi că ambudyiusearea a păzaril’ei la mpărmuturi u feaţiră trei mări bănţă ţi suntu tora tu România, cari li ţănu tu idyea scară tocurli interbancari pi nivelu naima mari, căţe au dinăpoi speculatori cu cheardiri mări tu aţea dit soni atacă ţi nu nu s-băgă tu lucru tu ţi mutreaşti leulu. Prezidentul a Asociaţiil’ei Români a Bănţălor, Radu Gheţea, spuni că aestă catandisi poati să s-bitisească tu şcurtu chiro: „Easti zborlu di niscănti operaţiuni speculativi ţi li-adrară operatorl’i, niscănţă di el’i di nafoara a sinurlor a văsiliil’ei. Minduiră la ună evoluţii, nu lă si ndreapsi... adrară operaţiuni speculativi, nu lă si ndreapsi. Ş-atumţea, lipseaşti ta să-ş--ancl’idă operaţiun’ile la iţi contu, căţe nu pot s-armănă cu operaţiun’ili niăncl’isi, şi bagă tocuri multu mări tra s-aducă lei. Păzarea nu avu leil’i aduşi aminti tu aţea oară şi s-agiumsi la tocuri multu mări. Minduescu că ti ndauă dzăli, va s-videmu ună isihăseari a păzaril’ei financiră”. Criştearea a tocurloru ţi u feaţiră bănţăli la mpărmuturli tră oamin’i eara ş-tru menga a Autoritatil’ei Naţională ti Protecţia a Consumatorlor. Instituţia bitisi un proiectu di reglementari a catandisil’ei, scupolu hiindalui tra s-crească şansili a aţilor ţi contestă tru instanţă crişterli a tocurlor. Proiectul easti minduit tra s-bagă tru lucru pi prot di yinaru. Reprezentanţăl’ii a bănţălor spun că crişterli s-feaţiră di furn’ia, macsus, că să scunchiră cabaia resursili financiari, ca rezultatu a crizăl’ei internaţionali di lichidităţ, ama şi a băgaril’ei tru practico năili arădz di mpărmutari apufusiti di BNR. Ma multu, pi păzrea interbancară, tocurli nica armănu tru scară analtă di itia a căftaril’ei mari di lei di cătră xen’i, iara bănţăli ţi ufilisescu aestu indicator ca hiindalui toc di referinţă tru contractili di mpărmutari minduescu s-treacă aesti custuseri suplimentari la muştiradzl’i a bănţălor. Di altă parti, Fondul Monetar Internaţional ari noimă ti ună vărtoasă ayăliseari a criştearil’ei economică tru Romania, anlu ţi yini, luyursită ti 4–5%, andicra di nivelu recordu di 8-9 proţenti antiţipat ti 2008. Aşi cum spuni reprezentantu a FMI di Bucuresti, Juan Fernandez-Ansola, mpărmutarea va s-ayălisească, iara lucurlu economic va s-ahurhească, orlea zorlea, s-tragă di aestă itii. Toradioară, aesti suntu maş previziun’i. Un lucru salami vini di la Institutlu Naţional di Statistică. Aestu dimăndă că Produslu Internu Brut ali Românie agiumsi, tru proţl’i şasi meşi a anlui la ună crişteari recordu di 8,8%, naima marea di la surparea a regimlui comunistu, tru 1989. Textul: Daniela Stefanescu Apriduţearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International