Radio Romania International

Arhiva :

MISURI EUROPENI ANTICRIZÂ
(2008-10-20)
Atea dit soni aspuneari: 2008-10-20 15:14 EET Print
Lideri ditu aţeali 27 di vâsilii ali UE s-vidzu câ suntu uniţ, la summitlu european ţi s-bitisi aieri Bruxelles, cându s-acâchisirâ ti unu program di ascâpari a bănchilor di la falimentu. Europen’il’i şi spusirâ tutunâoarâ apofasea s-l’ia misurli di cari easti ananghi ta s-ândrupascâ criştearea icunomicâ, amânânda ama, pân di bitisita a anlui, formularea a nâscântor priopuneri concreti tu aestâ dumeni. El’i dzâsirâ diznou câ nu aproachi ideea a unui plan european di relansari bugetarâ ş-aestâ, dzâcu specialiştil’i, va s-aibâ ca efectu mârearea a xichil’ei publicâ a statilor membri. Nica di tora, tu nâscânti vâsilii, xichea bugetarâ easti ma mari di plafonlu autorizat, di 3%, ti exemplu, tu Irlanda aestu agiumsi la 7%. Piricl’iu di recesiuni tu ma multi vâsilii europeani şi tu SUA feaţi gioi s-cadâ ma multi bursi, dupâ recordul negativ, istoric, înreghistrat, cu unâ dzuuâ ma ninti, pi Wall Street. Criza financiarâ mondialâ s-ducheaşti şi Bucuresti, iu, cu tuti declaraţiili optimisti a reprezentanţâlor BNR, bursa easti pi câdeari libirâ, valuta naţionala s-dusi câtâ nghios ş- mări investitori, cum easti Voest Alpine, si-au amânatâ lansarea a proiectilor. Prezidentul Traian Băsescu şi premierlu Călin Popescu -Tăriceanu, cari au participatâ la summitlu european di toamnâ,lâ feaţirâ timbihi a român’ilor câ şi România poati s-aibâ zn’ii, greali, di itia a trunduirllor di pi piaţa financiarâ internaţionalâ. Maca, di itia a normilor di afireari a sistemlui bancar, criza nu u agudi România, aestâ nu va s-dzâcâ câ himu ascâpaţ di piricl’iu, faţi timbihi prezidentul Băsescu: “Resursili financiari cari existeadzâ icâ cari potu s-yinâ câtâ ncoa, prindi s-hibâ pitricuti câtâ producţie, câtâ investiţii şi nu câtâ consum, maca vremu s-u ascâdemu la maximum etapa a daua ali crizâ financiarâ, cari easti criza icunomicâ, dimi ascâdearea ali icunumie alithea.” Tu condiţiili tu cari 70% di exporturli româneşti s-ducu câtâ UE, ş-multi vâsilii membri intrâ tu recesiuni, hârgiuiarea a pâradzlor publiţ prindi s-hibâ faptâ cu mintiminil’ie, sumcundil’iadzâ şi premierlu Călin Popescu -Tăriceanu :TRACK”Nu va s-putemu s-himu unâ nisie di prucuchie şi di performanţâ tu un ocean di fânicadz. Aestâ easti realitatea şi aestu easti, ma s- vreţ, mesajlu limbid ligat di turlia cu angâtanu şi mintimenâ cumu prindi s-hibâ gestionatâ icunumia tu chirolu ţi yini”. Cabinetlu a premierlui Tăriceanu tâni cheptu cu zori a presiunil’ei a crişterlor a tin’iilor di cafi mesu a lucrâtorlor, nai ma noulu exemplu hiinda aţel a profesorlor ţi au amintatâ tu Parlamentu, unâ crişteari di 50% - ti cari nu suntu pâradz la buget, dzâcu guvernanţâl’i. Mulţâ bancheri pistipsescu câ, tu Romanie, easti isihia dinintea a furtunâl’ei ş-câ scuncheaa a finanţărlor xeani va s-aducâ pisti puţân chiro unâ majorari a hărgilor ti creditari, şi pi lungu chiro, unâ scâdeari a criştearil’ei icunomicâ romaneascâ, tora nai ma marea ditu UE. Bruxelles, prezidentul ali Franţâ, Nicolas Sarkozy, a curi vâsilie asiguripseaşti prezidenţia ali Uniuni, deadi hâbari câ europen’il’i va s-pripunâ a SUA organizarea un summit internaţional, vahi tu meslu brumar, New York, aclo iu ari ahurhitâ criza. Aestu mesaj va s-hibâ datu mâni, la Camp David, a prezidentului George Bush di liderlu francez şi di prezidentul ali Comisiei Europeanâ, Jose Manuel Barroso, tu unâ andamusi, ţi ari tu scupo s-da unâ apandasi ti işearea ditu criză. Autor: Valentin Tigau Armânipsearea: Irina Paris

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International