Radio Romania International

Arhiva :

Ligătura anamisa di România -Italia – sinferuri deadun
(2008-10-10)
Atea dit soni aspuneari: 2008-10-10 12:02 EET Print
Ligătura anamisa di Bucureşti şi Roma fu, tu anlu dit soni, fuvirsită, cara nu pi lumăchili ufiţiali, barimu pi aţeali intercomunitari, di infracţiuni – niscănti greali – fapti di cetăţean’i român’i tu Hamunisie. Aesti feaţiră că autorităţli italiene să s-meastică cu un mănucl’iu di meatri serti tu ţi mutreaşti imigranţăl’i, niscănti di eali tu mardzina di nghios ali legislaţie europenă tru dumeni. Prota andamusi interguvernamentală romano-italiană, tu scară analtă, s-dizvărti, gioi, Roma, şi avu tru scupo eliminarea cariţido s-hibă niachicăserli anamisa di ligăturli bilaterali cum şi znuiarea imaginil’ei ali Românie şi a comunitatil’ei româneşti dit Hamunisie. Aţel’i doi premieri, Silvio Berlusconi şi Călin Popescu Tăriceanu, asiguripsiră că ligătura anamisa di România şi Italia easti unâ speţială şi nu poati s-hibâ tu piricl’iu di ndauă călcări di nom. Caplu a executivlui di Roma spusi că numirlu a român’ilor cari băneadză ş-lucreadză tin’isitu tu Italia treaţi di ună miliuni ama nu ascumsi că autorităţli nu va să s-trăxească prezenţa tu Hamunisia a inşilor cari nu suntu pi lucru şi calcă nomlu. Dit a lui videală, primlu ministru român cundil’e că guvernul di Bucureşti nu va ta s-fugă român’il’i tu xeani, că, al’iumtrea, adară campanii di informari tra s’l’i-aducă acasă. El adusi aminti că libira urdinari a inşilor easti un prinţipiu european di thimel’iu. Călin Popescu Tăriceanu: “Minduim că cetăţean’il’i român’i cari suntu cetăţen’i europen’i lipseaşti să s-hărsească di legislaţie şi s-hibă aprucheaţ ca iţi cetăţean european ţi lu-aşteaptă tu ună văsilie membră a Uniunil’ei Europenă şi dealihea că ari di partea a autorităţlor italiene un purtatic ahoryea andicra di imigranţăl’ii dit statili membri a Uniunil’ei Europenă şi dit statili cari nu suntu membri a Uniunil’ei Europenă şi aua easti, ma s-vreţ, partea di tu nchisită cari poati s-nă ducă după părerea mea ti aflarea cearei la problemili cu care nă ampulisim.” Părţăl’i lucreadză, di altă parti, ti ndridzearea a problemilor inşiti tu migdani, macsus, di comunitatea rromă, iara rezultatili suntu buni – spusi Silvio Berlusconi. Tu idyiul plan, ministerili di justiţie român şi italian andregu ună achicaseari bilaterală cari s-da izini ti transferlu un-alantu a inşilor condamnaţ fără s-hibă ananghi di apruchearea a lor. Tu plan economic, guvernul Berlusconi va tra s-da curayiu a mărlor companii italiene s-investească tu România, di iu producţia va s-hibă vindută pi păzări cum Rusia şi Sărbia. Italia va, tutunăoară, să s-meastică tu proiectili di infrastrucură ţi România va li crească cu finanţari europeană, ună cari va s-agiungă pănă tru 2013, 19 miliardi di euro. Textul: Stefan Stoica Apridutearea: Tascu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International