| Lucian Bute armâni campion mondial la boxu profesionistu 2011.07.11 |
| (2011-07-11) |
| Atea dit soni aspuneari: 2011-07-12 12:52 EET |
Pugilistul român Lucian Bute (tu ilichia di 31 di ani) ș-lu apără cu hăiri, ti a opta oară arada, titlul mondial la categoria superdimesi tu versiunea IBF. Sâmbătă seară, tu arada a unălei gală ndreaptă București, "Campion tră România", aproapea 10 nili di suporteri lu andrupără Lucian Bute, iara alță cama di 4 miliuni di români mutriră la televizor alumta ți u avu aestu cu francezlu Jean Paul Mendy. Maș di patru reprizi avu ananghi boxerlu român tra s-lu bagă mpadi, prit KO, pugilistul francez.
Tu ringu, ună ș-ună după victorie, Bute declară hărsit: ți anami spusit, am 15 di ani di carieră ama nu fu vărnăoară ca toraseara. Escu pirifan că escu român ș-că putui s-vă aduc haruua tu suflit. Vă haristusescu di tut suflitlu, vă voi ș-vă tinisescu". Tu conferința di presă ți u țănu dupu meci, aestu spusi că strateghia a lui avu un imnaticu ti anami, a deapoa croșeulu di stânga cu cari bitisi alumta fu lucrat multu kiro tu antrenamentu. Ia ți nă spusi Lucian Bute:
Mi ndrepșu multu ghini ti aestu meci. Di doi meși și giumitati escu tu cantonamentu, dauă antrenamenti ndzuuă, di șasi ori tu stămănă. Avui ună strateghie multu bună ndreaptă deadun cu antrenorlu Stephane Larouche. Lucrai ași cum ăni băgai tu minti ș-vini deapoa ațel knockout fără s-mi pidipsescu. Palmareslu al Lucian Bute easti ti zilipseari - 29 di victorii dit 29 di partidi alumtati la profesionismu, di aesti 24 li amintă prit KO.
După succeslu di sâmbătă seară, campionlu dusi tu Piața ali Universitati iu eara aștiptat di fanili ți eara viniț ta să-li yiurtusească victoria. Bute tăxi că anlu yinitor va s-aducă tu România dăuă foki ma s-poată s-amintă un meci ti unificarea a titlurlor la categoria superdimesi. Gala di București fu transmisă tru Europa, Asia și America de Nord. Aestu fu protlu meci ți lu avu Bute tu România, după ți tricu la boxul profesionistu, tru 2003.
Titlul mondial la categoria superdimesi, versiunea IBF, lu amintă tru sumedru 2007, Montreal, după ți lu azvimsi prit KO tehnic pi ațel ți u avea fokea, columbianlu Alejandro Berrio. Di atumțea, românlu ș-apără fokea opt ori arada, tuti victoriili hiindalui amintati prit KO. Tru 2008, lu-azvimsi americanlu William Joppy ș-mexicanlu Librado Andrade. Tru 2009 spusi giunami dinintea a columbianlui Fulgencio Zuniga și, diznău, dinintea al Librado Andrade. Anlu ți tricu, amintă partidili ți li avu cu Edison Miranda, di Columbia, ș-cu americanlu Jesse Brinkley, iara tru marțu 2011, partida cu britaniclu Brian Magee. Lucian Bute fu tinisit tu 2008 și 2009 cu harea di sportivlu a anlui tru România.
Vruț ascultători puteț s-ghivăsiț nota pi www.rri.ro ș-pi Facebook.
Textul: Andreea Bojoi
Apriduțearea: Tașcu Lala
|
2025-04-03
Print
Puteț s-avdzâț căndțido