Radio Romania International

Arhiva :

Lumea după 11 di yismăciuni
(2008-09-11)
Atea dit soni aspuneari: 2009-02-24 13:33 EET Print
“Voi u vreţ bana, noi u vrem moartea”. Cătu cinică şi lăhtăroasă, ahătu ti dealihea, dihotomia, spusâ pi un site islamist, va s-dzăcă spuni misurarea a slăbinţăl’ei tu ligătură cu lumea ţivilizată dinintea a terorişţălor kamikaze. Farâ fanatismul scândil’e a comandourlor Al-Qaida, 11 di yismăciuni 2001 nu vrea s-eara. Niţi atacurli fapti contra a seamnilor ţi u spun putearea financiară – pirgurli dzeamini di New York - şi militari - Pentagonlu - a Statilor Unite, niţi moartea fârâ noimâ a aţilor trei n’il’i di morţă, niţi haraua ascumtă ică aţea ţi anţapă a tutălor duşman’ilor ali democraţie nu vrea s-eara. Ciuşuită, ti un chiro, di lăhtari, America u spusi zorea şi apăndăsi dinintea a unlui inamic atipic. Un ţi nu ari prosup, ama cu n’il’i di prosupi, ţi nu ari un cartier general cu adresă ti dealihea, ţi nu ari organigramă, fără aradă, ţi nchiseaşti maş cu mintea pi aspărdzeari. Di aua şi niputearea a Casăl’ei Albă ta ş-aspună victoria după virtuala capitulare a aluştui. Nchisitâ dupu niţi un mes di dzăli di la atentati, aputrusearea dit Afganistan lu-avină di aclo caplu di la Al-Qaida, Ossama Ben Laden, ş-l’iavină di la puteari protectorl’ii a lui talibani. Aţea contra a Iraklui al Saddam Hussein scoasi tu migdani ama haua cari lă deadi izini a terorişţălor ta ş-adară năi sanctuari. Acă cheardirli işiş furâ orlea zorlea ma mări, n’il’ili di aschirladz americani şi aliaţ a lor vătămaţ pi aţeali dauă fronturi fură tră islamişti tut ahânti victorii. Tu lumi, aestă vulnerabilitati u hărni nţăpătura antiamericană a regimurlor paria di Phenian ică di Teheran şi li feaţi paradiplo, idyea tu China, Rusia, Belarus ica Venezulea, boţli ţi cutugursescu hegemonia a Statelor Unite. Ma laiu, criza irakiană li minti şi ligăturli transatlantiţi, multi canţelarii vest-europeani nu trapsiră mănă s-armănă largu di minduerli di la Casa Albă. Mutrindalui isăchili globali până tu anlu 2025, analiştil’i a comunitatil’ei di informaţii di Washington, alepţă cu zboarăli di corespondentul a nostru, spun că America va s-armănă prota puteari a lumil’ei, ama că dominaţia a l’ei va s-hibă multu n’icşurată. Washingtonlu numata va s-poată s-da cumandu cum va s-hibă spusi năili structuri globali, numata va s-hibă vărnu tu ipotisea di cumăndaru şi s-apufusească alăxerli a sistemlui internaţional - adavgă el’i. Năuntru, dupu şapti an’i di la deturnărli criminali, secretarlu american ti Securitati Naţională, Michael Chertoff, faţi timbihi că sectorlu aviatic armăni crehtu dinintea a terorismului, iara “Al-Qaida s-ascumbuseaşti ma largu cu mintea pi aviaţie”. Di altă parti, ama, s-duţi şi va s-ducă ma largu şi polimlu antiteroristu. Alidzerli prezidenţiali americani nu s-alăxescu mutrindalui avigl’area şi acăţarea alu Osama ben Laden, aestu hiindalui un scupo em ti prezidentul George W. Bush, em ti aţel ţi va s-yină pi scamnul a lui – cundil’e Casa Albă, tamam aprindu comemorarea atentatili dit 2001. Textul: Bogdan Matei Apriduţearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International