Radio Romania International

Arhiva :

TODOMONDO reprezintă România la Eurovision 2007
(2007-04-25)
Atea dit soni aspuneari: 2007-04-25 13:05 EET Print
După ună preselecţie naţională, finala românească tră Eurovision l’i-aleapsi amintători aţel’i şasi membri a trupăl’ei Todomondo, aestă hiindalui tru plan tra s-nă reprezintă tru concursul ţi s-ţăni tru capitala ali Finlandă, Helsinki, pi 12 di mai 2007. Ca totna, rezultatlu ali preselecţie naţională l-adusi harauă la niscănţă, ică niifharistuseari la alţă, ama aţea ţi acaţă loc ti dealihea easti că aţel’i şasi componenţă a trupăl’ei Todomondo suntu apufusiţ “s-ă spună ună muşeată păristiseari” la Eurovision 2007 şi să s-toarnă acasă “cu frămtea ndzeană”. Piesa interpretată di Todomondo ari numa Liubi, liubi, I love you şi ari ună n’ică pirmituseari, ţi nă u spuni tora Vlad Creţu, un di membril’i a trupăl’ei: “Piesa Liubi, liubi, I love you are ună miră, tuti curară, nu nă minduim niţi ună minută că va s-agiundzem aoa, tuti s-feaţiră tră tihea a noastră multu muşeată, avum marea şansă tra s-him calificaţ şi tra s-amintăm preselecţia naţională. Fum stres ligaţ şi spusim mari pistusini ti aestă piesă, căţe, un chiro, vahi că şi mira avu contribuţie ti succeslu a nostru. Duchim că lucărli va s-cură ma largu şi vrem multu di multu s-amintăm Helsinki, Doamni agiută!”. Componenţa a trupăl’ei Todomondo easti aestă: Andrei Ştefănescu şi Ghedi Kamara – doil’i fac parti dit ună trupă ţi easti cunuscută la noi, “Alb Negru”, Vlad Creţu – tru ahurhita membru a trupăl’ei Supermarket, iara di ndoi an’i componentu a mult-vrutăl’ei parei “Hara”, Bogdan Marian Taşcău, alias Mr. M – impresar a trupăl’ei şi tutunăoară compozitorlu a piesăl’ei Liubi, liubi, I love you, Cirro de Luca – amintat Napoli dit tată italian şi mamă româncă, di zănati militar, absolventu ali Academie di Carabinieri tru 1999 şi aţel dit soni ţi vini, Valeriu Răileanu, român di Cernăuţ (ţi zburaşti ghini limba rusă), cari feaţi şcoala di muzică până tu ilichia di 15 din an’i, iara tora cumănduseaşti un birou di striduţeri (adră striduţearea ună ş-ună cu furn’ia a vizităl’ei a prezidentului ali Ucraină tru România). Piesa Liubi, liubi, I love you fu compusă di Bogdan Marian Taşcău tru chiro record – trei minuti – veara ţi tricu, iniţial ti un nău album a trupăl’ei “Alb Negru”, ama, em Andrei Ştefănescu em Ghedi Kamara nu u lugursiră uidisită, lă si părea monotonă cântată tu română pi dauă boţ. Meslu yinar 2007, cu trei dzăli ninti di vadelu limită ti darea ma largu a piesilor ti preselecţia naţională a concursului Eurovision, Vlad şi Bogdan duchiră că vrea s-hibă multu uidisită ti aestu momentu şi s-acăţară di lucru: feaţiră orchestraţia, ngrăpsiră stihurli tru şasi limbi (engleză, italiană, spaniolă, rusă, franceză, română) şi aflară nica doi soţ di “suferinţă” – Cirro şi Valeriu. Lu-ascultăm diznău Vlad Creţu, cu ma multi: “Nchisim dit ahuhrită pi ideea a naturaleţăl’ei şi a simplitatil’ei, acă băgăm niscănti jgl’ioati speţifiţi ti folclorlu a văsiliilor pi cari li yilipsim tru cântic, iara tru naua variantă di orchestraţie acăţă şi ufilisim instrumenti caracteristiţi – mandolină, acordeon, ţambal, vioară şi cundil’em mesajlu a stihurlor. Mări alăxeri tru ‘show’ nu va s-hibă, tamam ti vrearea ali ideii di naturaleţi, cari lugursim că nă adusi thihi”. . Autor: Olivia Cristina Sima Armanipsearea: Aurica Piha

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International