Radio Romania International

Arhiva :

Apofasi mardzina di Amarea Lae
(2008-04-14)
Atea dit soni aspuneari: 2008-04-14 11:04 EET Print
Imaginea a prezidenţălor ali României şi a SUA, Traian Basescu şi George W. Bush, ţănandalui ună conferinţă di presă deadun avăndalui dinăpoi Amarea Lae feaţi, stămăna ţi tricu, anvărligarea a lumil’ei. Ndreaptă tru arada di lucru a summitlui NATO, cari adună chiro di trei dzăli, Bucureşti, oamin’il’ii di apofasi politiţ şi militari ali Alianţă, andamusea fu zuyrăpsită di presa dit România ca un amintatic di imagine ti caplu a statlui român, iara loclu ca hiindalui un multu ghini aleptu. Patru dzăli ma amănat, Amarea Lae s-turna diznău di eara tru menga a presăl’ei, cu furn’ia tră moeabeţli ti cari liderlu di Casa Alba s-dusi Soci, tru Crimeea, s-lu andămusească aţel di Kremlin. Aţel’i doi prezidenţă, a curi mandati s-aproachi di bitisită, alăsară noima a niscăntor buni ligături, ama rezultati concreti tru chestiuni diisuidusiti di mari simasie nu s-nreghistrară. Washington, corespondentul a nostru Doina Saiciuc feaţi ună isapi a moeabeţlor Bush-Putin: “Cara sâmbătă Bush şi Putin aflară lişor loclu deadun ti un subiectu ti cari dol’i au harauă să zburască - sportul - şi giucară pi un cor căzăcescu un gioc di adeti, dumănică prezidentul american şi omologlu rus nu ndreapsiră ici ţiva sertili gheafureali di mindueari ti planlu american mutrindalui sistemlu di apărare antirachetă tru Europa de Est. Idyil’i observatori spun că, acă cilăstisiră s-cundil’eadză bunili ligături persoanli, di s-alăvdară un alantu, dol’ii pricănăscură, tru idyiul chiro, că anamisa di el’i armăn disuiduseri vărtoasi, prota ş-prota ti sistemlu di apărari antirachetă şi ti lărdzearea cătră estu a Alianţăl’ei Nordu-Atlantiţi”. Washingtonlu ari naeti s-bagă tu lucru un radar Cehia şi dzaţi interceptoare di racheti, Polonia. Moscova, care s-ducheaşti fuvirsită, şi spusi ma multi ori arada ncuntrarea andicra di aestu proiectu, cu tuti apridunărli americani ti isihăseari. Tru 2007, Kremlinlu pripusi un compromis călisindalui Statili Uniti s-lucreadză deadun ti radarlu rusescu băgatu Gabala, tru Azerbaidjan. Soci, liderlu di Casa Albă cundil’e nica nă oară, că sistemlu anti-racheta ţi Washingtonlu va tra să-lu bagă tru Europa nu easti îndriptat contra ali Rusie ş-că oamin’il’i lipseaşti s-aproachi idheea că Polimlu Araţi s-bitisi. Vladimir Putin spusi, ama, ună 'nădie cu ngătan' tu ţi mutreaşti şansele tra s-agiungă la ună achicăseari, spunăndalui că aţeali dauă stati au ma largu 'puncti di videari disuidusiti ti niscănti chestiuni'. Cu tuti aesti, tru declaraţia comună a aţilor doi lideri să spuni că “dauli părţă şi spusiră sinferlu ti adrarea a unui sistem cari s-da pandisi a niscăntor fuvirseri ma s-aibă, cu rachetă, sistem tru cari Rusia, Statele Unite şi Europa s-l’ia parti ca parteneri isa”. Andamusea di dumănică fu şi ună furnn’ie nauă ti prezidentul Putin tra şi spună diznău ncuntrarea ti lărdzearea NATO, ţi, tru minduita a lui, ţăni di “logica a unăl’ei altă etă”. La summitlu di Bucureşti, liderl’ii a statilor a Alianţăl’ei Nord-Atlantiţi apufusiră s-amănă până tru andreu apofasea di aprucheari ali Ucraină şi Georgie tru Planlu di lucru ti aderarea la NATO, acă documentul di bitisită apufuseaşti, yinitoarea aderari a aţilor dauă stati la organizaţie. Textul: Corina Cristea Apriduţearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International