Radio Romania International

Arhiva :

Raportul ali Ascheri Români
(2008-04-09)
Atea dit soni aspuneari: 2008-04-09 11:47 EET Print
Aprăftăsita ti ndridzearea a summitlui NATO di stămăna ţi tricu, di Bucureşti, vrea să spună vără turlie ună harauă ti isapea di arada di cafi an ţi s-faţi la ministerlu român ali Apărarii. Cu tuti aesti, comandantul suprem, prezidentul Traian Băsescu, nu easti ici haristusit ti catandisea di tora ditu Ascheri. El nu ş-ascumsi nvirinarea că ministerlu nu băgă nica tru lucru apofasea a Consiliul Suprem di Aparari a Văsiliil’ei (CSAT) mutrindalui ridimensionarea efectivili ali ascheri, prota ş-prota prit n’icşurarea numirlu di ofiţeri superiori, ghini păltiţ, ama cu borgi ţi nu să ştiu, ş-ţi misură 8% dit corpul militar. Dit aeşţă, 86 suntu general’i activi, acă CSAT ava căftată că partenerlu gol a aiuştui grad s-armănă caplu a Statlui Major. Băsescu nica căftă a Guvernului s-hibă băgată tu aradă păltearea a tin’iilor di cafi mes a aschiraldzlor român’i ţi suntu tru misiun’i externe. Tin’iili a aluştor, acă suntu niheamă ma mări andicra di a aţilor ţi armasiră tru cazărn’ili dit văsilie, scadu niacumtinat, căţe s-păltescu tu dolari şi calcă pi scara di anghios a monedăl’ei americană. “Va s-hibă ună protă apofasi di tin’iseari tu aestu ditu soni mesu” – spusi, sertu, Basescu, şi adusi aminti bitisita di mandat a Cabinetlui. Ma multu, nica cutugursi prezidentul : “Numata putem să s-străximu di anu anu raportărli aproapea fără di stepsu, cu sumarăslu pi budză, ş-ţi spuni şi ună scară di nisinfer, că iara nu nă ndreapsim programlu di ancuparări.” Diplomat di formaţie, ministurlu liberal ali Apărari, Teodor Meleşcanu, aleapsi tra s-ghivăsească dit cutugurserli a prezidentului maş ună căndăseari că guvernul s-ahărdzească păradz ma mulţă ti ndridzearea ali ascheri. Anlu ţi tricu, nica spusi năsu, Ministerlu ali Apărari simnă contracti tră ancupărarea şapti aeronavi di turlia cargo şi 32 di transportoari blindati. Deapoa ti anlu aestu, ari nchisită, un proiectu di apoafasi di guvernu tră criştearea a diurnăl’ei aaschirladzlor arăspăndiţ tru teatrili di operaţiuni şi convertirea a aiştoru tru moneda europeană. Sumofiţerl’i, gradaţl’ii şi vuiniţl’i pot s-l’ia 100 di euro ndzuuă, iara ofiţerl’ii 120. Ma largu, nica tăxi Meleşcanu : “Duţearea ma largu a operaţionalizaril’ei, dimensionarea nivelu di nviţari, adăvdzearea cadrul strategic, armănearea tu idyea scară borgili internaţionali tru Afganistan, Irak şi Balcani armănu un lucru di thimel’iu.” Barimu aestu dit soni lucru, tră tin’isearea a borgilor externi, numata fu lucurlu ti ncuntrări minduitili anamisa di prezidentul atlantistu si Guvernul cari, tru 2006, avea nădie s-amintă capitalu electoralu dimăndăndalui pi napandica trădzearea dit Irak. Ascherili armasiră, iara la summit aliaţl’ii nu agărşiră s-pricănoască aţeali ţi-l’i si cadu ali Românie tru alumta internaţională contra a terorismului. 1.405 di militari roman’i loară parti, anlu ţi tricu, la misiun’i internaţionali. Doi ş-chirură bana şi 20 fură pliguiţ tru prota linie a frontului antitero, tru Afganistan şi Irak. Textul: Bogdan Matei Apriduţearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International