Radio Romania International

Arhiva :

Antiaruşfetea şi yimbruchea (11.02.2011/T.L.)
(2011-02-11)
Atea dit soni aspuneari: 2011-02-21 12:38 EET Print
Mărli ncl’ideri ţi s-feaţirâ tu dzâlili dit soni tu arada a poliţiştilor şi a yimbrukearlor di la sinurli cu vâsilii ţi nu suntu membri tu UE (Ucraina şi Sârbia) scoati tu videalâ ahândoasa aruşfeti dit câmpul di yimbruki, a curi arâdâţin’i criscurâ şi s-teasirâ tu aesti dit soni dekenii. Easti un lucru ti dealithea pricunuscut di tuţ politicien’il’i, acâ niţi un nu ascapă di iruşea ţi u l’ia ta s-arucâpi zverca a adversarlui responsabilitatea nai ma marea tu slaba kiverniseari a fenomenlui icâ ş-ti compliţitatea cu infractorl’ii. Tu un interviu la Radio România, prezidentul Traian Băsescu feaţi mari gaereti ta s-arâstornâ idheea multu zburâtâ di presa di opoziţie ţi spuni câ prota câbati ti aruşfeti dit yimbruchi, contrabanda pi cari aestâ u anvâleaşti şi aşi spusa minteari a politiclui tu operaţiun’ili paranom u au, acutotalui, Putearea di tora, agiumtâ pi scamnu tu 2009. Traian Băsescu: „Ma sâ zburâm ti lângoarea ţi easti tu sinurli româneşti, cadealithea easti câ şi ,imduita aesta ta sâ u arucâ pisti 2009-2010 easti unâ mari minciună. Arana easti veacl’e, easti multucunuscutâ şi tolerată di tuti partidili cari vinirâ unâ dupu alantâ la guvernari, dit '90 şi până tora. Tuti guverneali agiumti la puteari până tora nu avurâ volea ta s-calcâ aestâ cumatâ. Ia, s-aflâ un guvern, s-aflarâ niscânti instituţii cari feaţirâ aestâ intervenţie.” Liberali’i dit opoziţie, prit boaţea a liderului Crin Antonescu, aproachi câ la tutâ clasă politică âl’i si cadi ta s-hibâ cutuyursitâ trâ catastisea la cari s-agiumsi tu yimbruchi. Cu tuti aesti – spuni Antonescu – trâ ilegalităţle ţi s-aflarâ tora lipseaşti s-da giueapi autorităţli di tora. Prezidentul a PNL nu apruke, tutunâoarâ, susili a caplui a statlui mutrindalui posibila câbati a nâscântor foşti şefi di yimbruchi liberali, şi lâcâftă tra s-tragâ mânâ di la stilu aluziv şi s-da informaţii salami şi alithea, ma s-aibâ. Protlu ministru Emil Boc spuni că s-agiumsi la aestâ catastisi dit yimbruki di furn’ia a unâl’ei mehanie veacl’ie, pi cari executivlu a lui avu puterea ta sâ-lu disfacâ. Caplu a Guvernului lu scoasi di pi ipotisi şeflu ali Autoritati Naţionalâ a Yimbrukilor şi tâxeasti s-hibâ idyea turlie pi sirţâl’ie cu iţi demnitar cari, idyea-aluştui, va s-hibâ aflat câbati ti aruşfeti. Emil Boc: „Ca şef a Guvernului, voi s-asiguripsescu tuti instituţiili a statlui mintiti tu alumta contra ali aruşfeti şi a evaziunil’ei fiscale di andophiul a meu pân di mardzina. Nâpoi u spun toleranţă zero a Guvernului andicra di aruşfeti şi evaziuni fiscală. Ca şef a Guvernului, scoş di pi ipotisi şi va sâ scot ş-ma largu iţi demnitar numâsit prit apofasi a protlui ministru, demnitar contra a curi Parchetlu ahurhi ta sâ-l’i facâ isapea mutrearea penală”. Protlu ministru câftă, di altă parti, ali opoziţiei ta ş-li ayâliseascâ iruşili politiţi şi s-alasâ justiţia ta ş-facâ borgea. Puteţ s-ghivâsiţ aestâ spuneari aestâ nota cu numa Antiaruşfeti şi yimbruchea pi site–ul a nostru www.rri.ro nica ş-pi Facebook. Textul: Ştefan Stoica Armâneaşti: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International