Radio Romania International

Arhiva :

PRIVATIZARE DI PROTA THESI TRU ROMANIA
(2008-03-17)
Atea dit soni aspuneari: 2008-03-17 14:47 EET Print
Aproapea sigura, pi 21 di marţu, ghigantul american Ford va s-agiungă acţionarlu majoritar a companiil’ei româneşti Automobile Craiova prit atea că va s-l’ia pacheta di acţiuni, reprezentândalui 72,4% dit capital, ţi lu-ari statlu român. Spuneam „aproapea sigura” căţe, până tu dzua adusă aminti, nica lipseaşti s-hibă simnati ndauă achicăseri cu instituţiili locali di Craiova, nica ş-ună achicăseari cu Primăria mutrindalui discl’idearea a unlui birou di yimbruchi tru arada a societatil’ei. Nomlu mutrindalui privatizarea, votat di parlamentu, fu promulgat, dumănică, di prezidentul ali Românie, Traian Băsescu. S-aduţem aminti că fabrica ţi adară automobili di Craiova fu tu ahurită, ună suţiitati mixtă adrată di România, tru an’il’i 70 cu compania franceză Citroen, cari dupu niscănti niachicăseri cu autorităţli comunisti dit atel chiro, s-trapsi. După surparea a dictaturăl’i, fabrica fu loată di sud-coreen’il’i di la Daewoo, până cându aeşţă deadiră falimentu şi fu disnău ancupărată di stat. Avem umutea că american’il’i, ama şi oamin’il’i a uzinăl’ei craiovenă, va s-aibă tora cama multă tihi. Ma multu ş-ti atea că şi aestă privatizare s-feaţi cu pirmithi. După ţi Ford simnă, anlu ţi tricu, contractul ti ancupărarea a acţiunilor, Comisia Europeană dişcl’isi ună investigaţie mutrindalui aestă privatizarî. Tru bitisita ali anchetă, meslu ţitricu, Comisia Europeană căftă a guvernului român s-anvălească di la Fordu 27 die miliun’i di euro, păradz ţi reprezintă, aşi cum spun ofiţial’i european’i, agiutor di stat paranom ti privatizari. Comisia agiumsi pi isapea că România băgă niscănti condiţii ti asiguripsearea a unui nivelu di producţie şi anvălearea a forţăl’ei di lucru, apruchindalui al’iumtrea un păhă di vindeari ma n’icşurat. Dimi maş 57 miliun’i di euro. Importantu easti, ama, că producătorlu american ş-lo borgea s-aibă investiţii directi di 675 miliun’i di euro ti modernizarea a fabricăl’ei. S-aduţem aminti că un altu mari producător auto, Renault, easti tru România, francezl’ii fabricândalui, tru 2007, la uzinili di Piteşti (sud) cama di 230.000 autovehiculi. Craiova, Ford ş-lo borgea, tru ahuhrita, s-aibă ună producţie tru an di naima pţăn 200.000 di automobili. Cându aestă mardzină va s-hibă agiumtă, România va s-agiungă naima marli producator auto dit ţentrul şi estul a Europăl’ei. Iara, după tuti probabilităţli, lucărli nu va s-dănăsească aua. Prezidentul ali Agenţie tră Valorificarea Activili a Statlui, Teodor Atanasiu, declara că alti dauă mări firmi s-ndreg tra s-yină tru România. El nu spusi cari suntu aesti, ama mass media avea spusă, că easti zborlu ni ma multu ni ma pţăn andicra di german’ii di la Mercedes ş-di japonezl’ii di la Mitsubishi. Di Rolls Royce nica nu avdzăm ţiva! Textul: Mirel Rădulescu Apriduţearea: Taşcu Lala

		WMA
	64kbps :	1 2 3
	128kbps :	1 2 3
		MP3
	64kbps :	1 2 3
	128kbps :	1 2 3
		AAC+
	48kbps :	1 2 3
	64kbps :	1 2 3

Puteţ s-avdzâţ căndţido
aoa emisiun’ili RRI


Ascultaţ
Oarili la cari puteţ s-ascultaţ programili adrati di Secţia Armânească RRI pi Canalu 3 cu hroma veardi.
Oara (oara ali Românie)
17.30 - 18.00
19.30 - 20.00
21.30 - 22.00

Weather Forecast

Mascota istorica a RRI

© 1999 - 2011 Copyright Radio Romania International